الاحمدي قال لبيت النداء لبيت الشاعر/صالح عبد الاحمدي

الاحمدي قال لبيت النداء لبيت

الشاعر/صالح عبد الاحمدي

الأحمدي قال لبيت النداء لبيـت
لو يهتف الموت بسم العز لبيتـه

وحجت الوجه ما قد منها قفيـت
والشعر وازنت عمدانه وقفيته

على التقى والنقاء والجوده اتربـت
وابني على حسب ما اتربيت ربيتـه

الاوله طاعت الخالق بها بديـت
ما كان واجب للخالق اديتـه

والثانيه طاعت الوالد بها وفيـت
من طاعة الله حسب القول وفيتـه

والثالثه لا ذكرت المصطفى صليـت
صلوا على الهاشمي وال من بيتـه

والرابعه من تمنى له فنا اتمنيـت
العافية عندي اغلى ما تمنيتـه

والخامس الصدق با ينجيك لا اتحريـت
والكذب يرديك حتى لا تحاليتـه

والسادس الصبر كما طال ما مليـت
الصبر والضيف انا ما قط مليتـه

والسابع الجُمل لا فكيته اتعريـت
الجُمل لا جاك مهما كان شليتـه

والثامن العهد صونه حي ولا ميـت
لا تحسبه عهد الا لقد اوفيتـه

والتاسع السر وسع له اذا انسريـت
وان ضاق صدرك بسرك فانت افشيتـه

والعاشر الحب لا حبيت حد بقيـت
يمكن يجي يوم تندم ليش حبيتـه

وكم شواهد على خط الزمن حديـت
البعض عديت له والبعض عديتـه

لا تأمن الوقت يا ذي قلت سويـت
هو بيجي يوم تترك كل ما سيتـه

الناس للناس حتى لا قد استكفيـت
به ناس للمصلحة يعطيك لا اعطيتـه

يضحك بوجهك وينهش فيك لا قفيـت
وساعة الصدق لا ابصرته ولا ريتـه

والجيد هو جيد مهما عنه استغنيـت
لا حال بك شرفي الزلات لاقيتـه

في مجلس الجيد تغلى كل ما قليـت
ومجلس النذل ترخص كل ما اغليتـه

يا مكثر الاصدقاء حولك اذا عديـت
واقلهم ذي يلبوا في مواقيتـه

بعض العرب ما يُلبك لو به اتلبيـت
وبعضهم با يُلبك لا تلبيتـه

لا قال قويت واتقواك واتقويـت
تعرف طراز القبيلي لا تقويتـه

وصاحبي مثل ثوبي ذي به اتغطيـت
وان شح جيبه وعيبه بان غطيتـه

يا اللي تبا توي الباطل جعل لا ويـت
كم لي وانا اللي بدور حق مويتـه

وبندقي لا قنصت الشاردة ما اخطيـت
الا على الشر لا مديتها اخطيتـه

والخيط بيني وبين الناس ما فكيـت
وان شدوا ارخيت وان رخوه شديتـه

هذا ولا اخذت بين القبيلة واديـت
في السلف والعرف انا ما قط زليتـه

لو حملوني جبال الشام ما عديـت
والدين لا حملوني قرش هميتـه

الا على الضيف لا ادينت ما هميـت
با اعيش واقضيه وانشي باقي اوصيتـه

عذبني الجد وانا بعده اتعنيت
لو مال قارون في مخزاني افنيتـه

قيفي قريشي مكه قبلتي والبيـت
ورداع الدار ذي بالعز حليتـه

وذي بزتني وانا في حضنها اتبزيـت
امي اليمن من تعداها تعديتـه

يهناك يا شعبنا بالوحده اتهنيـت
عهد الخلافات والتشطير زليتـه

الحمد لله بعد الفرقة التميـت
والجرح ذي كان ينزف دم لميتـه

ما عاد شي فرق ان سربلت او ضميـت
اهم شي واجبك والفرض صليتـه

وواجبك لا ذكرت المصطفى صليـت
صلوا على الهاشمي وآلال من بيتـه